सतखेडे गावात सौरऊर्जेचा नवा किरण – शेतातील पहिला सोलर प्रकल्प कार्यान्वित*
*सतखेडे गावात सौरऊर्जेचा नवा किरण – शेतातील पहिला सोलर प्रकल्प कार्यान्वित*
वि. उपसंपादक :- पंकज पाटील
सतखेडे: निसर्गावर आधारित, स्वच्छ व पुनर्वापरक्षम ऊर्जेच्या दिशेने सातखेडे गावाने महत्त्वपूर्ण पाऊल उचलले आहे. गावातील प्रसिद्ध शेतकरी श्री. दिलीप झावरू पाटील यांच्या शेतातील विहिरीवर गावातील पहिला सौरऊर्जा प्रकल्प नुकताच यशस्वीरित्या बसवण्यात आला.
या प्रकल्पामुळे शेतीसाठी लागणाऱ्या पाण्याच्या उपशासाठी विजेची गरज आता सौरऊर्जेमुळे भागणार आहे. त्यामुळे वीजबचत, खर्चात घट, आणि पर्यावरणपूरक शेतीस चालना मिळणार आहे.
श्री. दिलीप पाटील यांनी यासंदर्भात बोलताना सांगितले, “परंपरागत ऊर्जेवर अवलंबून न राहता आपल्याला निसर्गातून मिळणाऱ्या सौरशक्तीचा अधिकाधिक वापर करणे काळाची गरज आहे. या प्रकल्पामुळे केवळ खर्चात बचत होत नाही, तर गावातील इतर शेतकऱ्यांसाठीही हा एक प्रेरणादायी मार्गदर्शक ठरेल.”
ग्रामस्थांनी आणि इतर शेतकऱ्यांनी या उपक्रमाचे स्वागत करत दिलीप पाटील यांच्या पुढाकाराचे कौतुक केले आहे. हा प्रकल्प गावाच्या शाश्वत विकासाची नवी दिशा ठरू शकतो, असा विश्वास व्यक्त करण्यात येत आहे.
