राजर्षी शाहू महाराजांचे समतावादी विचार हेच सामाजिक परिवर्तनाचे मूळ – प्रा. संदेश कासार
राजर्षी शाहू महाराजांचे समतावादी विचार हेच सामाजिक परिवर्तनाचे मूळ – प्रा. संदेश कासार
राहुरी तालुका जावेद शेख
“राजर्षी शाहू महाराजांचे कार्य केवळ सत्तेचे नसून ते जनसामान्यांच्या अस्मितेचे होते. आरक्षणाचा जनक, शिक्षणाचा कैवारी आणि अस्पृश्यता निवारक अशा विविध रूपांतून त्यांनी ज्या समतावादी समाजाचे स्वप्न पाहिले, ते स्वप्न आजही तितकेच प्रासंगिक आहे. त्यांच्या विचारांची कास धरल्याशिवाय आधुनिक महाराष्ट्राची प्रगती शक्य नाही,” असे प्रतिपादन प्रसिद्ध व्याख्याते प्रा. संदेश कासार यांनी केले.
अकोले तालुका एज्युकेशन सोसायटीच्या अगस्ती कला, वाणिज्य व दादासाहेब रुपवते विज्ञान महाविद्यालयाच्या वतीने आयोजित ‘राजर्षी छत्रपती शाहू महाराज जयंती’ विशेष व्याख्यानमालेत ते प्रमुख वक्ते म्हणून बोलत होते. ‘इतिसाला कलाटणी देणारे महापुरुष: राजर्षी शाहू महाराज’ या विषयावर त्यांनी अत्यंत अभ्यासपूर्ण विवेचन केले.
कार्यक्रमाच्या अध्यक्षस्थानी महाविद्यालयाचे उपप्राचार्य सी. एम. डोंगरे हे होते. त्यांनी आपल्या अध्यक्षीय भाषणात महाराजांच्या शिक्षणप्रेमी भूमिकेचे कौतुक करत विद्यार्थ्यांना शाहू महाराजांच्या जीवनप्रवासातून प्रेरणा घेण्याचे आवाहन केले.
या सोहळ्याला महाविद्यालयातील ज्येष्ठ मार्गदर्शक आणि प्राध्यापक वृंद मोठ्या संख्येने उपस्थित होते. यात कला शाखा प्रमुख एस. जी. टिक्कल, डॉ. एन. टी. आरोटे, महेश पाडेकर, आर. बी. गायकवाड, के. व्ही. जाधव आणि व्ही. एन. निमसे यांची प्रमुख उपस्थिती होती. या मान्यवरांच्या उपस्थितीने कार्यक्रमाची वैचारिक उंची अधिकच वाढली.
प्रा. संदेश कासार यांनी पुढे बोलताना सांगितले की, शाहू महाराजांनी कोल्हापूर संस्थानात काढलेली सक्तीच्या मोफत शिक्षणाची योजना असो किंवा उपेक्षितांना हक्काची वतने मिळवून देण्याचा संघर्ष असो, त्यांची प्रत्येक कृती ही सामाजिक न्यायावर आधारित होती. आजच्या काळात जेव्हा आपण जागतिकीकरणाच्या प्रवासात आहोत, तेव्हा महाराजांचे ‘बहुजन हिताय’ हे विचार अधिक सक्षमपणे अंमलात आणण्याची गरज आहे.
महाविद्यालयाच्या वतीने आयोजित या उपक्रमामुळे उपस्थितांना शाहू महाराजांच्या विचारांचे एक वेगळे दालन उघड झाले. कार्यक्रमाच्या यशस्वी नियोजनाबद्दल आणि विद्यार्थ्यांच्या उपस्थितीबद्दल उपस्थितांचे कौतुक करण्यात आले. कार्यक्रमाचे सूत्रसंचालन महेश पाडेकर व आभार प्रदर्शन डॉ.नितीन आरोटे यांनी मानले.
