जयवंतराव जगताप यांच्या नेतृत्वाखाली उद्या समर्थकांचा भव्य मेळावा. . .
जयवंतराव जगताप यांच्या नेतृत्वाखाली उद्या समर्थकांचा भव्य मेळावा. . .
करमाळा: (विशेष प्रतिनिधी सचिन जव्हेरी)
आगामी जिल्हा परिषद आणि पंचायत समिती निवडणुकीच्या पार्श्वभूमीवर करमाळा तालुक्यातील राजकीय वातावरण तापू लागले आहे. तालुक्याचे ज्येष्ठ नेते आणि कार्यकर्त्यांचे आधारस्तंभ माजी आमदार जयवंतराव जगताप यांच्या मार्गदर्शनाखाली सोमवार, ५ जानेवारी रोजी समर्थकांचा भव्य मेळावा आयोजित करण्यात आला आहे. या मेळाव्यामुळे तालुक्यात आगामी निवडणुकांचे रणशिंग फुंकले जाणार असल्याचे बोलले जात आहे.
निवडणुकीच्या रणनीतीवर विचार विनिमय करण्यात येणार आहे.
जिल्हा परिषद आणि पंचायत समितीच्या निवडणुका जवळ येत असल्याने सर्वच राजकीय पक्षांनी मोर्चेबांधणी सुरू केली आहे. करमाळा तालुक्यात जगताप गटाची मोठी ताकद आहे. हीच ताकद एकवटण्यासाठी आणि आगामी निवडणुकीत विजयाची रणनीती ठरवण्यासाठी या मेळाव्याचे आयोजन करण्यात आले आहे. या मेळाव्यात जयवंतराव जगताप कार्यकर्त्यांशी संवाद साधून त्यांना निवडणुकीच्या कामाला लागण्याचे आदेश देतील, अशी शक्यता वर्तवण्यात येत आहे.
अध्यक्ष: मा. आ. जयवंतराव जगताप
दिनांक: सोमवार, ५ जानेवारी २०२६
वेळ: दुपारी ठीक १:०० वाजता
स्थळ: यशोदीप मंगल कार्यालय, निलज रोड, करमाळा.कार्यकर्त्यांमध्ये उत्साहाचे वातावरण
या मेळाव्यासाठी तालुक्यातील कानाकोपऱ्यातून जगताप समर्थक मोठ्या संख्येने उपस्थित राहणार आहेत. ‘आगामी निवडणुकीत जगताप गटाची भूमिका काय असेल?’ आणि ‘उमेदवारीबाबत काय चर्चा होईल?’ याकडे संपूर्ण तालुक्याचे लक्ष लागले आहे. “आपल्या नेत्याच्या विचारांनी प्रेरित होऊन निवडणुकीच्या मैदानात उतरण्यासाठी आम्ही सज्ज आहोत,” अशी भावना अनेक कार्यकर्त्यांनी व्यक्त केली आहे.
तरी या मेळाव्यास सर्व जगताप समर्थकांनी आणि कार्यकर्त्यांनी वेळेवर उपस्थित राहावे, असे आवाहन संयोजकांच्या वतीने करण्यात आले आहे.या मेळाव्याची जय्यत तयारी आता अंतिम टप्प्यात आली असून जगताप गटाच्या या कार्यकर्ता मेळाव्याकडे संपुर्ण तालुक्याचे लक्ष लागले आहे.
