जळगाव जिल्हा परिषदेच्या नव्या ‘सीईओ’ करिश्मा नायर*
*जळगाव जिल्हा परिषदेच्या नव्या ‘सीईओ’ करिश्मा नायर*
जिल्हा प्रतिनिधी :- पंकज पाटील
जळगाव :-जळगाव जिल्हापरिषदेत प्रशासकीय फेरबदल झाले असून, मुख्य कार्यकारी अधिकारी मीनल करणवाल यांची मुंबई येथील नानाजी देशमुख कृषी संजीवनी प्रकल्पात (शासकीय संस्था) बदली झाली आहे. त्यांच्या जागी नाशिक महानगरपालिकेच्या अतिरिक्त आयुक्त करिश्मा नायर यांची नियुक्ती करण्यात आली आहे. मंत्रालयातून उशिरा रात्री या बदल्यांचे आदेश निर्गमित झाले आहेत.
मीनल करणवाल यांची स्तुत्य कारकीर्द
गेल्या दीड ते दोन वर्षांच्या कार्यकाळात मीनल करणवाल यांनी जळगाव जिल्हा परिषदेच्या माध्यमातून अनेक लोकोपयोगी उपक्रम प्रभावीपणे राबवले. विशेषतः ग्रामीण विकासाच्या दृष्टीने त्यांनी घेतलेले निर्णय आणि प्रशासकीय शिस्त यामुळे त्यांची कारकीर्द जिल्ह्यात गाजली. त्यांच्या बदल्याच्या वृत्तामुळे प्रशासकीय वर्तुळात चर्चा होत असून, त्यांच्या पुढील वाटचालीस शभेच्छा दिल्या जात आहेत.
नव्या ‘सीईओ’ करिश्मा नायर यांच्याबद्दल..जळगाव जिल्ह्याला करिश्मा नायर यांच्या रूपाने पुन्हा एकदा एक तरुण आणि तडफदार महिला अधिकारी लाभली आहे. नायर या २०२१ च्या बॅचच्या आयएएस अधिकारी असून त्यांनी फॉरेन्सिक सायन्समध्ये बी.एस्सी. पदवी संपादन केली आहे.
करिश्मा नायर यांचा अल्प परिचय
जन्म: २७ नोव्हेंबर १९९७
शिक्षण: बी.एस्सी (फॉरेन्सिक सायन्स)
प्रशासकीय अनुभवः यापूर्वी त्यांनी प्रकल्प अधिकारी तथा सहाय्यक जिल्हाधिकारी म्हणून काम पाहिले आहे. २ एप्रिल २०२५ पासून त्या नाशिक महानगरपालिकेत अतिरिक्त आयुक्त म्हणून कार्यरत होत्या.जळगाव जिल्हा परिषदेच्या माध्यमातून ग्रामीण भागातील शिक्षण, आरोग्य आणि पायाभूत सुविधांचा दर्जा उंचावण्याचे मोठे आव्हान नवनियुक्त सीईओ करिश्मा नायर यांच्यासमोर असेल. मीनल करणवाल यांनी सुरू ठेवलेला विकासाचा वेग कायम राखण्याकडे सर्वांचे लक्ष लागून आहे.
जळगाव जिल्ह्याला पुन्हा एकदा उच्चशिक्षित आणि कर्तव्यदक्ष अधिकारी मिळाल्याने समाधान व्यक्त होत आहे.
