राष्ट्रमाता जिजाऊ न पा शाळा क्र .3 कुर्डूवाडी येथे विद्यार्थ्यांनी बनविल्या पर्यावरण पूरक बीज राख्या
राष्ट्रमाता जिजाऊ न पा शाळा क्र .3 कुर्डूवाडी येथे विद्यार्थ्यांनी बनविल्या पर्यावरण पूरक बीज राख्या
एस डब्ल्यू न्यूज नेटवर्क
कुर्डुवाडी : .राष्ट्रमाता जिजाऊ न पा शाळा क्रं 3 कुर्डूवाडी येथे रक्षाबंधनसाठी पर्यावरण पूरक राखी म्हणून बीज राख्या बनवण्यात आल्या. आपल्या भारत देशामध्ये सण उत्सव समारंभ यांना पर्यावरणाच्या दृष्टीने विशेष महत्त्व आहे.श्रावण महिना जवळ आला की मराठमोळ्या सण उत्सवांची चाहूल लागते.पण उत्सवांच्या धामधुमीत निसर्गालाही हानीकारक गोष्टी वाढत चालल्या आहेत.रक्षाबंधन सणानंतर वापरलेल्या राख्यांची विल्हेवाट लावणे अवघड होते.त्यामुळे राष्ट्रमाता जिजाऊ न पा शाळा क्रं 3 कुर्डूवाडी येथील विद्यार्थिनींनी पर्यावरण पूरक आणि शून्य कचरा निर्माण होईल अशी आगळी वेगळी संपूर्णपणे बियांपासून बीज राखी बनवली. पर्यावरण पूरक आणि शाश्वत उत्सवाचे प्रतीक म्हणून या राख्या बनविल्या आणि आम्ही बनवलेल्या राख्याच आम्ही आमच्या भावाला बांधणार असे म्हणून मुली या राख्या घरी घेऊन गेल्या.
बीज राख्या बिया,कागद आणि कापूस यापासून बनविलेल्या असल्यामुळे पर्यावरणाचे प्रदूषण कमी होते.ही राखी म्हणजे भावंडातील बंधाच्या वाढीचे आणि पोषणाचे प्रतीक आहे. निसर्गाच्या सौंदर्याचे प्रतीक आहे. यासाठीभोपळा,दोडका,घोसावळे ,कारले,मेथी,कोथिंबीर,शेंगदाणे, वाटाणा, भेंडी,चवळी,गहू, ज्वारी ,मोहरी या बिया वापरण्यात आल्या.रक्षाबंधनानंतर या राख्या कुंडीत मातीत पुरल्यास यापासून रोपे तयार होतील आणि कागद दोरा यांचे मातीत विघटन होईल.
बीज राखी बनवण्यासाठी शाळेच्या मुख्याध्यापिका इंदुमती पाटील,उपशिक्षिका रेश्मा मिरगणे आणि आशुतोष पावले यांनी मार्गदर्शन केले.
