ई-बिट ऍप ने पोलिस झाले स्मार्ट
ई-बिट ऍप ने पोलिस झाले स्मार्ट
वि. उपसंपादक :- पंकज पाटील
अमळनेर :- अमळनेर जनतेच्या सुरक्षेसाठी नाईट राऊंडला पोलिसांची हजेरी कळावी कर्तव्यात कसूर होऊ नये म्हणून लावलेली आर एफ आय डी यंत्रणा कालबाह्य झाली असून आता स्मार्ट ई बिट ऍप मुळे पोलिस अधिक स्मार्ट झाले असून कामचुकारपणा करताच येणार नसून रात्रीच्या गुन्ह्यांसाठी हे ऍप अतिशय उपयुक्त ठरणार आहे._रात्री होणाऱ्या चोऱ्या ,गुन्हे ,काळाबाजार , अवैध वाहतूक याला आळा घालण्यासाठी , जनतेच्या सुरक्षेसाठी पोलिसांना आळीपाळीने नाईट राऊंड दिला जातो. यात काही कामचुकार पोलीस नाईट राऊंड करत नसल्याने अनेकदा चोऱ्यांचे प्रमाण वाढत होते. मी तिथेच होतो , मी गेल्यावर घडले असेल ,माझ्या आधी घडले असेल अशी अनेक कारणे दिली जात होती. यावर मात करण्यासाठी पोलीस प्रशासनाने शहरात विविध ठिकाणी आर एफ आय डी यंत्रणा कार्यान्वित केली होती. यात ठराविक लोकेशनला एक रिसिव्हर लावला जायचा. व पोलिसांना रिमोट सारखे यंत्र दिले जायचे. त्यामुळे पोलिसांना जागेवर जाणे भाग होते. रेडिओ फ्रिक्वेन्सी तंत्रज्ञान असल्याने हजेरीचा , नाईट राऊंड डेटा त्यातून निघत असे. रिसिव्हर स्कॅन केले जायचे त्यात काही कामचुकार पोलिसांनी पर्याय शोधून काढला होता. रिसिव्हर चा फोटो काढून मोबाईल मध्ये जर रिमोट ने स्कॅन केले तरी पोलिसांची त्या जागेवर हजेरी लागत होती. आणि हळूहळू पोलीस नाईट राऊंड न करता घरबसल्या स्कॅन करून नाईट राऊंड दाखवत होते.
शासनाने त्यावर मात करून आता प्रायोगिक तत्वावर काही जिल्ह्यात स्मार्ट ई बिट ऍप माध्यमातून नाईट राऊंड ची हजेरी सुरू केली आहे. यात पोलीस स्टेशन प्रभारी आणि हजेरी मास्तर हे ऍडमीन असतील आणि प्रत्येक पोलिसांच्या मोबाईल मध्ये स्मार्ट ई बिट ऍप डाऊनलोड असेल. त्यात आधीच नाईट राऊंड ची ठिकाणे नोंदलेली असतील. पोलिसांनी ऍप उघडले की ज्या ठिकाणावर त्यांना नेमले आहे तेथे जाऊन फक्त क्लिक करायचे आहे. जर पोलिसाने लांब अंतरावरून क्लिक करण्याचा प्रयत्न केला तर त्याला मोबाईल सांगतो की तुम्ही नेमून दिलेल्या स्थळापासून इतक्या अंतरावर आहेत. ऍप मध्ये स्थळचे अक्षांश रेखांश नोंदले असल्याने प्रत्यक्ष त्याच ठिकाणी गेल्यावर हजेरी लागणार आहे. एखादा पॉईंट सोडून दिला तरी पोलीस निरीक्षक आणि हजेरी मास्तर याना कोणत्याही क्षणी पाहता येते. कोण कर्मचारी कोणत्या ठिकाणी किती वाजता गेला याची अचूक माहिती मिळते.
विशेष म्हणजे नाईट राऊंड ला असलेला कोणता कर्मचारी कोणत्या लोकेशनला आहे हे लगेच कळते त्यामुळे कर्मचारी खोटे बोलू शकत नाही. रात्री अपरात्री काही घटना घडल्यास पोलीस निरीक्षक स्मार्ट ऍप मधूनच सर्व नाईट राऊंड च्या कर्मचार्यांना व्हॉइस मेसेज ने सूचना देऊ शकतात. त्यामुळे अवघ्या काही क्षणात पोलीस घटनास्थळी पोहचू शकतात. घटनेच्या जवळ असणारे पोलीस टॅबतदोब जाऊन पळून जाणाऱ्या गुन्हेगारांचा शोध घेऊ शकतात. कर्मचारी आपल्या मोबाईल मधूनच शेअर इंसिडन्ट मधून घटनेचे फोटो टाकून सत्य परिस्थिती कळवू शकतात. काही नागरिक बरेच दिवस गावाला जातात तेव्हा त्यांची नोंद हाऊस लॉक मध्ये केल्याने प्रत्येक कर्मचाऱ्याला कळते की याठिकाणचे घर बंद आहे. त्यामुळे तेथे विशेष लक्ष दिले जाते. हिस्ट्री सीटर गुन्हेगारांची नोंद केलेली असल्याने त्यांची तपासणी देखील केली जाते. अनेकदा गुन्हेगार इकडून तिकडे जातात आणि दोन्हीकडील पोलीस त्यांना तपासताना कंटाळा करतात की तो इकडे आलेला नाही. मात्र आता गुन्हेगार जिथे आढळेल तिथले पोलीस जबाबदार असतील म्हणून प्रत्येक जण अचूक काम करणार आहे. वाहने तपासणे देखील या ऍप द्वारे शक्य होणार आहे.
प्रायोगिक तत्वावर हे ऍप सुरू केले आहे. प्रत्येक पोलिसांच्या मोबाईल मध्ये ऍप टाकून त्यांना प्रशिक्षण देण्यात आले आहे. या ऍप मध्ये अजून अनेक सुविधा असल्याने पोलीस अधिक स्मार्ट होणार आहेत. गुन्ह्यांचा तपास लवकर होऊन पोलीस सक्रिय होणार आहेत.- दत्तात्रय निकम , पोलिस निरीक्षक ,अमळनेर पोलीस स्टेशन
